Sefela sa Moshe

1 Yaba Moshe le bana ba Iseraele ba binela Morena sefela sena, ba re:

“Ke tla binela Morena,

hobane ruri o itlotlisitse ka tlholo;

o lahletse pere

le mopalami wa yona

ka lewatleng.

2 Morena ke matla a ka,

le thoko ya ka;

ke yena ya mpholositseng,

ke Modimo wa ka,

mme ke tla mo rorisa,

ke Modimo wa ntate,

mme ke tla mo tlotlisa.

3 Morena ke mohlabani,

lebitso la hae ke Morena.

4 O dihetse dikariki tsa Faro,

le mabotho a hae ka lewatleng,

mokgetho wa balaodi ba hae

wa teba Lewatleng la Lehlaka.

5 Bodiba bo ba pupeditse,

ba theohetse tlasetlase jwaloka lejwe.

6 “Morena, tsoho la hao le letona

le tlotlisitswe ka matla,

Morena, tsoho la hao le letona

le thuankantse sera.

7 Ka boholo ba botlotlehi ba hao,

o diha ba o tsohelang matla;

kgalefo ya hao ha e tuka

e ba tjhesa jwaloka mmoko.

8 Ka moya o tswang nkong tsa hao

metsi a bokellana, metsi a phallang

a ema jwaloka lerako,

madiba a tuduana

botebong ba lewatle.

9 “Sera se ile sa re:

ke arole kgapo, ke kgotsofale.

Ke tla hula sabole ya ka,

ka tsoho la ka ke ba timetse.>

10 O ile wa fokisa moya wa hao,

lewatle la ba kwahela,

ba teba jwaloka loto

metsing a tshabehang.

11 “Morena, ke mang

ya kang wena hara medimo?

Ke mang ya kang wena,

ya tlotlehang ka kgalalelo?

Ya tshabehang ka botumo?

Ya etsang mehlolo?

12 O ile wa otlolla

letsoho la hao le letona,

yaba lefatshe le a ba metsa.

13 “Ka mohau wa hao

wa tsamaisa setjhaba,

setjhaba seo o se lopolotseng,

ka matla a hao wa se isa diahelong,

diahelong tsa hao tse halalelang.

14 Ditjhaba tsa utlwa,

mme tsa thothomela,

baahi ba Filesitia

ba tshwarwa ke tshabo.

15 Marena a Edomo a ile a ferekana,

mahosana a Moabe

a otlanya mangwele,

baahi bohle ba Kanana ba nyamela.

16 Tshabo le thothomelo

tsa ba wela hodimo,

ka matla a tsoho la hao

ba kgutsitse jwaloka majwe,

ho fihlela tjhaba sa hao se feta,

tjaba sa hao Morena,

ho fihlela tjhaba seo se feta,

seo o iphumanetseng sona.

17 O ba fihlisitse,

mme wa ba ahisa thabeng ya hao,

sebakeng seo

o se entseng leaho la hao, Morena,

Sehalalelong se entsweng

ka matsoho a hao, Morena.

18 Morena o tla busa

kamehla le mehla!”

19 Dipere tsa Faro, le dikariki tsa hae tsa ntwa, le bapalami ba hae, ba ile ba kena lewatleng, mme Morena a kgutlisetsa metsi a lewatle hodima bona, empa bana ba Iseraele bona ba tsamaya hara lewatle, mobung o ommeng.

Sefela sa Meriama

20 Yaba Meriama wa moporofeta, kgaitsedi ya Arone, o nka moropa ka letsoho la hae; basadi bohle ba tswa, ba mo sala morao, ba nkile meropa, mme ba etsa motjeko.

21 Meriama a phokola sefela, a re:

“Binelang Morena,

hobane ruri o itlotlisitse,

o itlotlisitse ka tlholo,

o lahletse pere

le mopalami wa yona

ka lewatleng.”

Metsi a babang a Mara

22 Jwale Moshe a tlosa Baiseraele Lewatleng la Lehlaka, ba ya lehwatateng la Shure. Ba tsamaya lehwatateng ka matsatsi a mararo, empa ba se ke ba fumana metsi.

23 Ba fihla Mara, empa ba sitwa ho nwa metsi a Mara, hobane a ne a baba. Ke ka lebaka lena sebaka seo se reilweng lebitso la Mara.

24 Setjhaba sa korotlela Moshe, sa re: “Re tla nwa eng?”

25 Yaba Moshe o ipiletsa ho Morena, mme Morena a mmontsha sefate. Moshe a nka lekala la sona a le lahlela ka metsing, mme metsi a eba monate.

Morena a ba beela molao le taelo, a ba a ba leka hona moo,

26 mme a re: “Haeba le hlile le mamela lentswe la Morena Modimo wa lona, mme le etsa ho lokileng mahlong a hae; le sekehela ditaelo tsa hae tsebe, le boloka melao yohle ya hae, nke ke ka le otla ka mafu wohle ao ke ileng ka otla Baegepeta ka wona, hobane ke nna Morena, Mofodisi wa hao.”

27 Jwale ba fihla Elime, moo ho neng ho ena le didiba tse leshome le metso e mmedi, le difate tse mashome a supileng tsa dipalema, mme ba hloma ditente tsa bona pela metsi.