Matla a Modimo le bofokodi ba motho
1 Jobo a araba, a re:
2 “Ruri ke a tseba,
ho fela ho le jwalo;
motho a ka loka jwang
mahlong a Modimo?
3 Haeba motho
a ka phea kgang le Modimo,
Modimo a ka mmotsa potso
di le sekete,
motho a pallwa ke ho araba
leha e le nngwe.
4 Modimo o bohlale, o bile o matla:
Ke mang ya ka mo hanyetsang,
yaba o a atleha?
5 Hanghang o suthisa dithaba,
ha a halefile a di phethole.
6 O sisinya lefatshe madulong a lona,
ditshiya tsa lona di be di reketle.
7 O laela letsatsi, le se ke le tjhaba,
a ba fifatse kganya ya dinaledi.
8 Ke yena ya sarolotseng mahodimo,
a a sarolla a le mong,
a tsamaya le hodima maqhubu,
maqhubu a Lewatle;
9 a etsa Bere e Kgolo,
le Makolobe, le Selemela,
a etsa le molala
ka borwa ho lehodimo.
10 O etsa dikgolo
tse fetang tlhalohanyo ya motho,
o etsa dimakatso
tse ke keng tsa balwa.
11 “Ha a feta pela ka
ha nke be ke mmone,
ha a itsamaela
le teng ha ke lemohe.
12 Ha a inkela,
a ka thibelwa ke mang?
Ke mang ya ka reng ho yena:
13 Modimo ha a halefile
eba o halefile,
mahlahana a Rahaba
a tjapaletse maotong a hae.
14 “Jwale nna
ekaba nka mo arabisa jwang?
Mantswe a dikgang
ke a kgethe jwang?
15 Leha ke se na molato
ke ne nke ke ka mo araba,
haese feela ho kopa mohau
ho Moahlodi wa ka.
16 Leha nka mo isa kgotla,
yaba o a tla,
ha ke dumele
a ka ntshekehela tsebe.
17 A ka mpidila ka sefefo sa kganyapa,
a nkekeletsa maqeba ho se lebaka.
18 A ke ke a ntumella
ka phefumoloha,
a ka ntshithabetsa
ka tse bohloko.
19 Haeba ho uwa ka matla,
Yena ke seqhobane!
Haeba ho uwa ka toka,
yena o tla qoswa ke mang?
20 Leha eba ke se molato,
ke tsuwa ke molomo wa ka,
leha eba ke se na kodi,
wona o tla nthwesa molato.
21 “Le hoja ke se na kodi,
ke se ke itenne;
ke nyedisa bophelo ba ka,
ke a bo nyatsa.
22 Ke ditshwantshwang feela;
ke ka hona ke reng:
23 Ha kotlo e bolaya ka ho tsometsa,
O tla tsheha
ha ba otlwa ba se molato.
24 Lefatshe le matsohong a ba kgopo,
o kwahela baahlodi ba lona
ka lesira mahlong;
haeba e se yena,
ebe jwale ke mang?
25 “Tshiu tsa ka di lebelo
ho feta semathi,
di baleha di eso bone molemo;
26 di fefoha jwaloka sekepe sa lehlaka,
jwaloka ntsu
ha e ubella phofu ya yona.
27 Ha nka re:
fahleho sa ka se tla ela,
ke bobothehe.
28 Tlokotsi tsa ka tsohle
ke a di tshaba,
ke a tseba
o ke ke wa re ha ke molato.
29 Kaha ke fumanwe ke le molato,
ke hobaneng ha ke sebeletsa lelea?
30 Leha eba nka itlhatswa ka lehlwa,
ka sesepa matsoho a ka ka a hatlela,
31 wena o tla nkakgela ka tebetebeng,
aparo tsa ka le tsona
di be di nnyonye!
32 “Modimo hase motho jwaloka nna,
ka hona nke ke ka ba ka mo araba,
fahleho bobedi tsa thulana
re le ka kgotla.
33 Hoja pakeng tsa rona
mmoelanyi o teng,
a sebedisa matla a hae hodima rona;
34 thupa Modimo e ke e shape fatshe,
kgalefo ya hae e se ke ya ntshosa;
35 ke bue ka bolokolohi
ke se ne tshabo,
athe hona jwale
nna ke tletswe ke tshabo.